user preferences

New Events

Amerik Santral / Karayib

no event posted in the last week

Ayiti: Sit-in 15 oktòb 2012

category amerik santral / karayib | enperyalis / lagè | news report author Thursday October 18, 2012 16:47author by Batay Ouvriye Report this post to the editors

Depi 8 lane deja, chak 15 oktòb, l ONI renouvle kontra MINISTA a, dekwa pou fòs politik ame sa a swadizan genyen yon “legalite” pou okipe peyi nou an.

Tout moun konnen ekzaksyon tout kalite, krim, vòl, vyòl ak represyon tribòbabò fòs lanmò sa yo simaye nan peyi a depi yo vini a. Tout moun viv imilyasyon fòs politik Minista yo blayi anwo dirijan “ayisyen” yo ansanm ak sou tout fòmasyon sosyal la an jeneral. Tout moun ka wè aklè tou, fòs sa yo pa vini vre pou “mete sekirite ak lapè nan peyi a” (si se te sa, nou ta pito di yo vini pou mete sa yo rele “lapè simityè” a), non: yo pito vini pou bay pwojè enpeyalis la sekirite! Vreman vre, se yo ki prensipal bakòp desizyon anbasad prensipal peyi enpeyalis yo - lò sila yo pa vini kareman ak pwòp fòs militè pa yo, tankou nou te ka wè aprè latètranble janvye 2010 la.

ayitimayday18.jpg

Chak lane, ansanm ak divès òganizasyon konsekan sou beton an, nou toujou mobilize pou denonse sitiyasyon lawont dènyezeta sa a. Ane 2012 la pa t fè defo.

Nou dwe remake, anplis, pozisyon anpil-anpil nan konpatriyòt nou yo evolye. Nonsèlman piplis nan nou konprann kesyon an pi byen men, sitou, piplis nan nou deside angaje yo nan batay KLE sa a (sè ke, anplis tout imilyasyon ak avilisman prezans sa ka pote ni sou tè Desalin la, ni devan pwòp diyite pa nou jounen jodi a, pwa fòs militè enpeyalis sa a twò lou anfas mobilizasyon sektè pwogresis la dwe reyalize an pwofondè pou chanje peyi pouri ak enjis sa a tout bon vre). “An pwofondè” paske, si se pou ti chanjman kosmetik, ti kawousèl “demokratik”, enpeyalis yo ap toujou pa gen pwoblèm kontinye kite nou... gouye!

Kidonk, jou ki te 15 oktòb 2012 la, apati apèl Kolektif mobilizasyon pou dedomaje viktim kolera yo, ansanm ak diferan lòt òganizasyon oswa militan pwogresis, nou te prezan yon fwa ankò nan denonsiyasyon sitiyasyon malpouwont ak danjere sa a (yon repòtaj foto anekse).

Fò n di sedikalis ameriken ki soti nan Nouyòk ansanm ak militan pwogresis ameriken nan Miyami, an kontak ak nou, te prezan tou. Vremn vre, 2 delegasyon sa yo ki te genyen an tou 6 mann, te ansanm ak nou anfas baz anvayisè yo, dekwa pou yo menm tou, antanke pwogresis entènasyonalis, yo montre pozisyon anti-okipasyon yo e kouman yo vle di se pa “Pèp ameriken” ki gen politik okipasyon-titèl-avilisman sa a, se gouvènman peyi enpeyalis sila a, onon miltinasyonal y ap sèvi yo.

Nan repòtaj foto a n ap ka wè tou, anplis prezans denonsiyasyon nou, lefèt, vreman vre, ajan pi reyaksyonè ak Lwijanboje Minista yo te parèt. Tou dabò pou anpeche nou manifeste (nou pap sezi devan lefèt Minista toujou la pou anpeche sitwayen jwi dwa denokratik nou rache ak tout lit nou); answit yo chache konfiske kamera, dekwa pou nou pa gen prèv konplo atake nou yo t ap prepare a (wè foto yo); anfen, pou chache arete kareman sèten militan prezan. Vijilans nou mete sou rezistans nou fè yo fè bak.

Se ke, fiyamezi sit-in la t ap devlope, popilasyon ozalantou a te kòmanse ap rele “Aba Minista!” tou. Ata moun nan machin piblik ki t ap pase yo t ap rele anmwe tou kont prezans fòs lanmò sa yo. Moun nan machin prive tou te an jeneral apiye nou, pran entèvansyon nou t ap distribye yo, bay opinyon yo, akò yo tou. Men se te piplis nan machin piblik adezyon a te konplè e ak anpil anpil fòs. Menm genyen sitwayen ki mete tèt yo deyò fenèt machin piblik yo pou joure manman Minista! Sitwayen sa yo pafwa te menm montre yo trè enève, pwofondeman enève, ak yon rayisman reyèl, ...sen.

Lapolis te jwe wòl pa li. Okòmansman, yo chache anpeche nou okipe kafou a tou, men ak diskisyon. Epi, fiyamezi (fiyamezi diskisyon yo, fiyamezi ensistans nou, fiyamezi rezon nou, fiyamezi popilasyon an ki t ap patisipe piplis la, fiyamezi konsyans yo tou) yo vin nonsèlman bay pasaj men yo menm fè trafik pou pi byen òganize evenman an, yo menm bare lawout pou machin Minista ki te vini pou simen latwoublay yo pa rete sou plas.

Kapasite sa a nou devlope a, INITE sou pwen sa a ki nan lapratik nou devlope a, pèsistans nou sou pwen FONDAMANTAL sa a, avansman konsyans popilasyon a ansanm ak sa pwogresis tout kalite... tout sa dwe met ansanm pou nou rive finalman DEBARASE NOU DE TOUT AJAN ENPEYALIS SA YO, YO MENM ASANM AK TOUT SOUSOU-KOLABORATÈ K AP SOUTNI YO.

ABA MINISTA! ABA OKIPASYON! ABA OKIPASYON! ABA OKIPASYON!
VIV AYITI GRAN MOUN TÈT LI!

This page can be viewed in
English Italiano Deutsch
Verso lo sciopero generale e sociale nel mondo del lavoro, nei territori, nelle piazze

Amerik Santral / Karayib | Enperyalis / Lagè | News Report | ht

Sat 01 Nov, 02:26

browse text browse image

img_0001wb_2.jpg image19 oktòb: Aba Ministah-kolera! 20:48 Fri 21 Oct by Batay Ouvriye 0 comments

19 oktòb rive! Sa fè yon lane depi Minista vin pote kolera bay nou ! ABA MINISTA-KOLERA! Fòk tout viktim kolera jwenn bon jan dedomajman kòmsadwa! Men se pa kolera sèlman Minista pote bay nou kòm malè. Yo vòlè, yo vyole, yo piye, yo dechèpiye, yo touye nou, yo reprime nou san gade dèyè, yo imilye nou san rete, y ap viv byen anwo lajan y ap resevwa nan non nou, swadizan pou vin ede nou pandan se malè tou sèl y ap pote bay nou. ABA MINISTA!

Sorry, no stories matched your search, maybe try again with different settings.

imageMINISTA (MINUSTAH)= Kolera Oct 27 MOVIK 0 comments

Kolektif Mobilizasyon pou Dedomajman Viktim Kolera yo (KOMODEVIK) ak Moun Viktim Kolera yo (MOVIK) Nòt pou laprès, 15 oktòb 2013.

imagePozisyon Kolektif la sou demach pou renouvle manda MINISTA yon lòt fwa ankò Sep 04 0 comments

Nan moman kote bak peyi a preske chavire, otorite nan tèt peyi a ki santi yo konfòtab ak okipasyon an mete ak Nasyonzini, deside renouvle manda MINISTA pou yon lòt lane ankò. Pwosesis renouvèlman sa a rive nan yon kontèks kote peyi a ap plonje nan yon kriz san bout, kote kòripsyon fè de pou senk nan administrasyon leta a, nan ekip Martely-Lamohte la. Nou konstate pandan prezans fòs okipasyon an, zak vyolasyon dwa moun kontinye ap taye banda pirèd. MINISTA se youn nan prensipal vyolatè dwa moun ki gen nan peyi a. Se nan sans sa a, nou denonse ak tout fòs nou, konplo MINISTA ak otorite yo ap fè pou kraze plas REZISTANS nan Pòsali. Zak sa yo montre aklè, MINISTA ak pouvwa a ap konplote ansanm pou mete baboukèt sou libète piblik yo. Plizyè moun ki nan tèt leta a, gen non yo site nan anpil zak imoral, zak kòripsyon ak zak kriminèl. Menm prezidan repiblik la, ki eli nan eleksyon kominote entenasyonal la, eleksyon Bill Clinton ak MINISTA a, pifò moun nan peyi a pa konnen ni si li ayisyen, ni si li ameriken. Nan antouraj prezidan repiblik la, gen plizyè gwo palto ki gen non yo site nan zak kidnaping, komès dwòg ak anpil lòt move zak. Sa ki pi grav, moun sa yo nan tout koulwa ap pran lapawòl, pran desizyon oubyen « dyaloge » nan non pouvwa kale tèt la. Arestasyon yon depite an fonksyon, Lanmò sispèk jij Jean Serge JOSEPH ki t ap mennen ankèt sou fanmi prezidan an pou dwèt long siperyè, divès zak pèsekisyon politik tankou tantativ arestasyon avoka ki sou dosye kòripsyon Sofia ak Olilivier Martely a, arestasyon Josue Florestal ak Enold Florestal ki te pote plent kont fanmi prezidan an epi bri k ap kouri pou kraze palman an, se yon seri siy ki montre aklè, gen yon machin diktati k ap deplòtonnen vitès li sou tèt peyi nou an. Li lè pou nou reveye nan dòmi pou bare wout okipasyon an ak konstriksyon dikatati a.

imageAyiti: Sou Grèv Lendi 9 Janvye 2006 la Jan 08 Batay Ouvriyé 0 comments

Pou nou menm nan Batay Ouvriye, se yon apèl ki dirèkteman e ouvèteman kont enterè nou menm nan mas popilè yo. Nan solisyon y ap mande - e konstwi - a, grèv la se yon premye pa. Lòt la se kont nou l ap ye, etan done depi nan premye pa a, yo pa kenbe kont de vre nati ak vre fòm pwoblèm PA NOU nan kesyon ensekirite a. Vreman vre, pou rezoud pwoblèm gang yo, depi yo mitraye katye popilè yo an laj (yo ta ka menm mande lage de bonm alawonnbadè!), pwoblèm pa yo regle.

© 2005-2014 Anarkismo.net. Unless otherwise stated by the author, all content is free for non-commercial reuse, reprint, and rebroadcast, on the net and elsewhere. Opinions are those of the contributors and are not necessarily endorsed by Anarkismo.net. [ Disclaimer | Privacy ]